وائرلیس برین چپ پہلی بار کسی انسان میں کامیابی سے نصب

 =====================================================================

وائرلیس برین چپ پہلی بار کسی انسان میں کامیابی سے نصب

ٓٓٓٓٓٓٓٓٓٓٓٓٓٓٓٓٓٓ===================================

ٹیکنالوجی کی صنعت کی ارب پتی شخصیت ایلون مسک نے اعلان کیا ہے کہ ان کی کمپنی نیورالنک کی بنائی وائرلیس برین چپ پہلی بار کسی انسان میں کامیابی سے نصب کر دی گئی ہے۔

ان کے بقول ابتدائی نتائج کے مطابق چپ لگائے جانے کے بعد مریض کے دماغ میں حوصلہ افزا نیوران اسپائک یا اعصابی تحریکیں دیکھی گئی ہیں جبکہ مریض تیزی سے صحتیاب بھی ہو رہا ہے۔

نیورالنک سے قبل کئی حریف کمپنیاں پہلے ہی ایسے آلات مریضوں کے دماغ میں لگانے کے تجربات کر چکی ہیں۔

بی بی سی نے اس متعلق نیورالنک اور امریکہ کی فیڈرل فوڈ ایند ڈرگ ایڈمنسٹریشن (ایف ڈی اے) سے رابطہ کیا ہے۔

ایف ڈی اے نے پچھلے سال مئی کے مہینے میں ایلون مسک کی کمپنی کو برین چپ کی انسانوں پر تجربے کی اجازت دی تھی۔

اس کے نتیجے میں ایک چھ سالہ مطالعہ شروع ہوا جس کے تحت سرجری کے ذریعے 64 بال سے بھی باریک دھاگے دماغ کے اس حصے میں لگائے جاتے ہیں جو جسمانی حرکت کو کنٹرول کرتا ہے۔

نیورالنک کا کہنا ہے کہ ان کا بنایا گیا امپلانٹ بیٹری سے چلتا ہے جس کو وائرلیس طریقے سے چارج کیا جا سکتا ہے۔ کمپنی کا کہنا ہے کہ یہ تھریڈز اس تجرباتی امپلانٹ کو دماغی سگنلز وائرلیس طور پر بھیجتا ہے جو ایک ایپ میں منتقل کردیے جاتے ہیں۔ یہ ایپ ان پیغامات کو ڈی کوڈ کرتا ہے کہ متعلقہ شخص کس طرح حرکت کرنا چاہتا ہے۔

ایلون مسک نے سماجی رابطے کی ویب سائٹ ایکس (ٹوئٹر)، جس کے وہ مالک بھی ہیں، پر لکھا ہے کہ نیورالنک کے اس آلے کا نام ٹیلی پیتھی ہوگا۔

ان کا کہنا ہے کہ ٹیلی پیتھی استعمال کرنے والا اپنے فون یا کمپیوٹر کو اپنی سوچ کے ذریعے کنٹرول کر پائے گا۔ اور اس فون یا کمپیوٹر کے ذریعے کسی بھی ڈیوائس کو کنٹرول کیا جا سکے گا۔

ابتدائی طور پر یہ آلہ ان افراد کو لگایا جائے گا جو جسمانی طور پر مفلوج ہیں۔

نیورلنک کو ماضی میں تنقید کا نشانہ بنایا گیا۔ روئٹرز نے دسمبر 2022 میں رپورٹ کیا تھا کہ کمپنی ٹیسٹنگ میں مصروف ہے جس کے نتیجے میں تقریباً 1,500 جانور ہلاک ہوئے، جن میں بھیڑ، بندر اور خنزیر شامل ہیں۔

جولائی 2023 میں امریکی محکمہ زراعت کے سربراہ نے کہا کہ اسے کمپنی میں جانوروں کی تحقیق کے قواعد کی کوئی خلاف ورزی نہیں ملی۔

تاہم ایجنسی کی جانب سے الگ سے تفتیش جاری ہے۔ مسک کی کمپنی کو مئی 2023 میں ایف ڈی اے کی طرف سے انسانوں پر چپ کی جانچ کرنے کی اجازت دی گئی تھی۔

نیورالنک کی صلاحیتیں کیا ہیں؟

 نیورالنک کا مقصد فالج کے شکار لوگوں کو دماغی سرگرمی کا استعمال کرتے ہوئے آلات کو دور سے کنٹرول کرنے کی اجازت دے کر بات چیت کرنے میں مدد کرنا ہے۔ مستقبل میں، نیورلنک صارف کی یادداشت اور علمی صلاحیتوں کو بڑھانے، صارف کی موٹر، ​​حسی اور بصری افعال کو بحال کرنے کے ساتھ ساتھ اعصابی عوارض   کے علاج کرنے میں مدد کر سکتا ہے۔۔